డికె బహిష్కరణ తాత్కాలికమేనా?

తెలుగుదేశం పార్టీ నుంచి చిత్తూరు ఎంపి డికె ఆదికేశవులునాయుడు బహిష్కరణ తాత్కాలికమనే అనుమానాలు అందరికీ వస్తున్నాయి. జిల్లాలో పరిస్ధితులను బట్టి చూస్తూంటే ఆయనను తిరిగి తెలుగుదేశం పార్టీ లోకి తీసుకునే అవకాశాలు ఎక్కువగా కనిపిస్తున్నాయి. సోమవారం జిల్లా కేంద్రమైన చిత్తూరులో అభిమానులు,కార్యకర్తలుతో డి.కె ఒక సమావేశం ఏర్పాటు చేసారు. ఈ సమావేశానికి కార్యకర్తలు,నేతలతో పాటు ఆయన సామాజిక వర్గానికి చెందిన వారు కూడా అధిక సంఖ్యలో హాజరయ్యారు.సమావేశానికి హాజరైన వారిలో ఎక్కవ మంది పార్టీని వీడి వెళ్ళద్దంటూ డికెను వేడుకోవటం కనిపించింది.

అందుకు తగినట్లుగానే డికె కూడా ఉంటానని కానీ,వెళతానని కానీ తేల్చకుండా మాట్లాడారు. ఈ విషయమై డికెతో పార్టీ అధినేత చంద్రబాబునాయుడు సోమవారం ఫోన్ లో మాట్లాడినట్లు తెలిసింది. తొందరపాటు అడుగులు వేయద్దని ఈ సందర్భంగా చంద్రబాబు సూచించినట్లు సమాచారం. అయితే ఈ విషయాన్ని డికె మాత్రం ఖండిస్తున్నారు.అనంతరం జరిగిన కార్యకర్తల సమావేశంలో మాత్రం డికె కొంత మెతక వైఖరితోనే మాట్లాడారు.దీన్ని బట్టి డికె బహిష్కరణ తాత్కాలికమే అన్నట్లు అనిపిస్తోంది.