మమ్మల్ని ఆశీర్వదించండి: వైయస్

నిజామాబాద్: తమను తిరిగి అధికారంలో నిలబెట్టాలని ముఖ్యమంత్రి డాక్టర్ వైయస్ రాజశేఖర రెడ్డి ప్రజలను కోరారు. నిజామాబాద్ జిల్లాలోని నిజాంసాగర్ ఆధునీకరణ పనులకు ఆయన మంగళవారం శ్రీకారం చుట్టారు. ఈ సందర్భంగా జరిగిన బహిరంగ సభలో ఆయన ప్రసంగించారు. ప్రజలకు మేలు చేయడానికి తాము నిరంతరం కృషి చేస్తున్నామని, మరిన్ని మేళ్లు చేయడానికి తమ ప్రభుత్వాన్ని ప్రజలు నిలబెట్టాలని ఆయన అన్నారు. ప్రభుత్వం చేపట్టిన వివిధ అభివృద్ధి, సంక్షేమ పథకాల గురించి ఆయన వివరించారు.

ఇచ్చిన మాట తప్పని తమ ప్రభుత్వాన్ని ఆశీర్వదించాలని ఆయన ప్రజలను కోరారు. నిజాంసాగర్ ను పర్యటక కేంద్రంగా తీర్చిదిద్దుతామని ఆయన చెప్పారు. నిజాంసాగర్ కు ఆధునిక కళ తెస్తామని ఆయన చెప్పారు. మూడేళ్లలో ఆధునీకరణ పనులు పూర్తవుతాయని ఆయన చెప్పారు. ఈ బహిరంగ సభలో శాసనసభా స్పీకర్ కె.ఆర్. సురేష్ రెడ్డి, మంత్రులు పొన్నాల లక్ష్మయ్య, షబ్బీర్ అలీ, పార్లమెంటు సభ్యుడు మధుయాష్కీ తదితరులు పాల్గొన్నారు.

నిజాంసాగర్ ఆధునీకరణ పనులను 549 కోట్ల రూపాయల వ్యయంతో చేపడుతున్నారు. ఈ పథకం పూర్తయితే 356 గ్రామాలకు చెందిన దాదాపు రెండు లక్షల ఎకరాలకు సాగునీరు అందుతుంది.