అణు ఒప్పందంపై ఒక్కటైన విపక్షాలు

హైదరాబాద్: అమెరికాతో అణు ఒప్పందానికి నిరసనగా గురువారం రాష్ట్రంలోని ప్రతిపక్షాలన్నీ ఒకే వేదికపైకి వచ్చాయి. హైదరాబాదులోని ఇందిరా పార్కు వద్ద జరిగిన మహా ధర్నాలో ప్రతిపక్షాల నాయకులు అమెరికాతో భారత్ ఒప్పందాన్ని నిరసించాయి. నారా చంద్రబాబునాయుడు (టిడిపి), కె. నారాయణ (సిపిఐ), బి.వి. రాఘవులు (సిపిఎం), డాక్టర్ మిత్రా (ప్రజారాజ్యం), నాయని నర్సింహారెడ్డి (తెలంగాణ రాష్ట్ర సమితి) భారత ప్రభుత్వంపై విమర్శల జడివాన కురిపించారు. అణు ఒప్పందం భారత్ కు మరణశాసనమని చంద్రబాబు విమర్శించారు. అణు ఒప్పందం ఇద్దరు వ్యక్తులు అమెరికా అధ్యక్షుడు జార్జి బుష్, భారత ప్రధాని మన్మోహన్ సింగ్ ల మధ్య జరిగిన ఒప్పందమని ఆయన అన్నారు.

యుపిఎ ప్రభుత్వం ధరలను తగ్గించలేకపోతోందని, ఉగ్రవాద చర్యలను అరికట్టలేకపోతోందని, కానీ అణు ఒప్పందం చేసుకోవడానికి మాత్రం ఆఘమేఘాల మీద కదిలిందని ఆయన విమర్శించారు. భారత ప్రధాని మన్మోహన్ సింగ్ ప్రపంచ బ్యాంకు మనిషిగా పనిచేస్తున్నారని నాయని నర్సింహారెడ్డి వ్యాఖ్యానించారు. భారత ఆత్మగౌరవాన్ని ప్రభుత్వం తాకట్టు పెడుతోందని నారాయణ వ్యాఖ్యానించారు. దేశవ్యాప్తంగా తలపెట్టిన ఆందోళనలో భాగంగా గురువారం ఈ ధర్నా జరిగింది. రాష్ట్రవ్యాప్తంగా ప్రతిపక్షాలు అణు ఒప్పందానికి వ్యతిరేకంగా ఆందోళనలు చేపట్టాయి.