యువగర్జనకు బెదరం: మొయిలీ

హైదరాబాద్: తెలుగుదేశం పార్టీ యువగర్జనకు బెదరబోమని కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ అన్నారు. యువగర్జన సదస్సు ప్రభావం తమ పార్టీపై ఉండదని ఆయన గురువారం మీడియా ప్రతినిధులతో అన్నారు. తీవ్ర నిరాశనిస్పృహలతో తెలుగుదేశం పార్టీ కొట్టుమిట్టాడుతోందని ఆయన వ్యాఖ్యానించారు. తెలుగుదేశం పార్టీలో తీవ్రమైన విభేదాలు ఉన్న విషయం అందరికీ తెలుసునని ఆయన అన్నారు. ప్రజలు తమ కాంగ్రెస్ పార్టీ వెంటనే ఉన్నారని ఆయన అన్నారు. తెలుగుదేశం పార్టీని ప్రజలు విశ్వసించబోరని ఆయన అన్నారు.

తెలుగుదేశం పార్టీ వ్యవహారాల గురించి తమ పార్టీ నేత, కేంద్ర మంత్రి పురంధరేశ్వరి ఇప్పటికే చాలా చెప్పారని ఆయన అన్నారు. స్వర్గీయ ఎన్టీ రామారావు పట్ల తెలుగుదేశం పార్టీ నాయకులు ఎంత దురాగతం చేశారో కూడా అందరికీ తెలిసిందేనని ఆయన అన్నారు. పాత వారసత్వాన్ని ముందుకు తెచ్చి ప్రజలను మధ్యపెట్టాలని తెలుగుదేశం పార్టీ నాయకులు ప్రయత్నిస్తున్నారని ఆయన అన్నారు. అధికారం కోసమే తెలుగుదేశం పార్టీ అదంతా చేస్తోందని ఆయన అన్నారు. తెలంగాణపై సరైన సమయంలో నిర్ణయం తీసుకుంటామని ఆయన చెప్పారు.