హైదరాబాద్ పేలుళ్లలో అనుమానితుడు: వైయస్

హైదరాబాద్: బుధవారం పోలీసులపై కాల్పులు జరిపిన వికారుద్దీన్ హైదరాబాదు పేలుళ్ల కేసులో అనుమానితుడని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. వికారుద్దీన్ డిజెఎస్ కార్యకర్త అని ఆయన చెప్పారు. విచారణ నిమిత్తం పట్టుకునే ప్రయత్నం చేస్తుండగా వికారుద్దీన్ పోలీసులపైకి కాల్పులు జరిపాడని ఆయన చెప్పారు. వికారుద్దీన్ పై నిఘా ఉందని ఆయన చెప్పారు. హైదరాబాదులోని సంతోష నగర్ లో బుధవారం మధ్యాహ్నం జరిగిన కాల్పుల సంఘటన శాసనసభలో చర్చకు వచ్చింది.

కాగా, అపోలో అస్పత్రిలో చికిత్స పొందుతున్న హెడ్ కానిస్టేబుల్ రామరాజును పోలీసు డైరెక్టర్ జనరల్ (డిజిపి) ఎస్ఎస్పీ యాదవ్ పరామర్శించారు. బుధవారం మధ్యాహ్నం ఒంటి గంట ప్రాంతంలో సంతోషనగర్ సంఘటన జరిగినట్లు హైదరాబాదు పోలీసు కమీషనర్ ప్రసాదరావు చెప్పారు. ఈ సంఘటనతో సంతోష్ నగర్ ప్రాంతంలో తీవ్ర ఉద్రిక్తత నెలకొంది. ప్రజలు రోడ్ల మీదికి వచ్చి ఉగ్రవాదులకు వ్యతిరేకంగా నినాదాలు చేశారు.