రేణుకా చౌదరిపై మంగుళూరులో కేసు

మంగళూర్: మంగుళూర్ చీఫ్ జ్యుడిష్యల్ మెజిస్ట్రేట్ కోర్టు ముందు కేంద్ర మహిళా శిశు సంక్షేమ మంత్రి రేణుకా చౌదరిపై క్రిమినల్ కేసు నమోదైంది. మంగుళూర్ మేయర్ గణేష్ హోసబెట్టు, తదితరుల సూచన మేరకు న్యాయవాది పిపి హెగ్డే ఈ కేసు దాఖలు చేశారు. మంగుళూర్ వాసులపై చేసిన వ్యాఖ్యలకు గాను మూడు రోజుల్లోగా క్షమాపణ చెప్పకపోవడంతో సోమవారంఈ కేసును దాఖలు చేశారు.

ఈ కేసులో దోషిగా తేలితే మూడేళ్ల కారాగారవాసం అనుభవించాల్సి వస్తుందని హెగ్దే చెప్పారు. మెజిస్ట్రేట్ కేసును నమోదు చేసుకున్నారు. మంగళవారం దీనిపై విచారణ ప్రారంభం కానుంది. మంగుళూర్ ను తాలిబనైజ్ చేశారని రేణుకా చౌదరి చేసిన ప్రకటనపై వివాదం చెలరేగింది. రేణుకా చౌదరి చిన్న సంఘటనలను దురుద్దేశంతో పెద్దవి చేసి చూపుతున్నారని హెగ్డే విమర్శించారు.