వైయస్ అవినీతి భగీరథుడు: ఎన్టీఆర్

తుని: ముఖ్యమంత్రి డాక్టర్ వైయస్ రాజశేఖర రెడ్డిని సినీ నటుడు జూనియర్ ఎన్టీఆర్ అవినీతి భగీరథుడిగా అభివర్ణించారు. సాగునీటి ప్రాజెక్టల్లో ప్రభుత్వం అవినీతికి పాల్పడిందని ఆయన విమర్శించారు. ఆయన శనివారం తన పర్యటనను తూర్పు గోదావరి జిల్లాలో కొనసాగించారు. ఐదేళ్లయినా పోలవరం ప్రాజెక్టును వైయస్ ప్రభుత్వం పూర్తి చేయలేకపోయిందని ఆయన తప్పు పట్టారు. కోస్తా కారిడార్ పేర భూములను కబ్జా చేస్తున్నారని ఆయన ఆరోపించారు.

వచ్చే ఎన్నికల్లో రాజకీయానుభవం, పాలనా దక్షత గల నారా చంద్రబాబు నాయుడి నాయకత్వంలోని తెలుగుదేశం పార్టీని గెలిపించాలని ఆయన ప్రజలకు పిలుపునిచ్చారు. మార్పు తెస్తామని అంటున్నారని ఆయన పరోక్షంగా ప్రజారాజ్యం పార్టీ అధినేత చిరంజీవిని ప్రస్తావిస్తూ ఆ మార్పు కోసమే గతంలో కాంగ్రెసు పార్టీని గెలిపించి మోసపోయారని, అటువంటి మార్పునకు సంబంధించిన నినాదాలను ప్రజలు నమ్మవద్దని ఆయన అన్నారు. మార్పు పేరుతో ప్రయోగాలు చేయవద్దని ఆయన సూచించారు.