తెలంగాణపై వైయస్ మాటే మాది: సోనియా

హైదరాబాద్: తెలంగాణపై ముఖ్యమంత్రి డాక్టర్ వైయస్ రాజశేఖర రెడ్డి శాసనసభలో చేసిన ప్రకటనకు తాము కట్టుబడి ఉన్నామని కాంగ్రెస్ అధ్యక్షురాలు సోనియా గాంధీ చెప్పారు. కరీంనగర్ ఎన్నికల ప్రచార సభలో ఆమె మంగళవారం మధ్యాహ్నం ప్రసంగించారు. తెలంగాణ ఇవ్వడానికి తమకు ఏ విధమైన అభ్యంతరాలు లేవని, దీన్ని అత్యంత ప్రధామైన అంశంగా పరిశీలిస్తున్నామని ఆమె చెప్పారు.

రాష్ట్రానికి వైయస్ రాజశేఖర రెడ్డే నాయకుడని ఆమె చెప్పారు. రాజశేఖర రెడ్డి ప్రభుత్వం చేపట్టిన సంక్షేమ, అభివృద్ధి కార్యక్రమాలను ఆమె వివరించారు. తెలుగుదేశం పార్టీపై విమర్శలు గుప్పించారు.తెలంగాణకు తెలుగుదేశం పార్టీ మోసం చేసిందని ఆమె అన్నారు. ప్రజారాజ్యం అధినేత చిరంజీవిపై కూడా వ్యాఖ్యలు చేశారు. బిజెపి మతతత్వ వైఖరిని ఆమె దుయ్యబట్టారు.రైతుల కోసం ప్రధాని డాక్టర్ మన్మోహన్ సింగ్ చేపట్టిన రుణ మాఫీ తదితర పథకాలను ఆమె ప్రస్తావించారు.