వైయస్ వల్లే ఉగ్రవాద అడ్డా: మోడి

హైదరాబాద్‌: కాంగ్రెస్‌ పార్టీ అరవై ఏళ్లుగా ప్రజలను దోచుకుంటోందని, స్విస్‌ బ్యాంకులో దాచిన లక్షల కోట్ల రూపాయల దోపిడీ సొమ్మును తాము తెస్తామంటే ఆ పార్టీకి నిద్ర కరవైందని గుజరాత్‌ ముఖ్యమంత్రి నరేంద్రమోడీ అన్నారు. భారతీయ జనతా పార్టీ (బిజెపి) రాష్ట్ర శాఖ హైదరాబాద్‌లోని నిజాం కాలేజి గ్రౌండ్స్‌లో సోమవారం సాయంత్రం ఏర్పాటు చేసిన ఆయన ప్రసంగించారు. ఏటా 2.5కోట్ల మందికి ఉద్యోగాలు ఇస్తామని చెప్పిన కాంగ్రెస్‌ ప్రభుత్వం గత నెలలో 5 లక్షలమందిని నిరుద్యోగులను చేసిందని విమర్శించారు. ముఖ్యమంత్రి డాక్టర్ వైయస్ రాజశేఖర రెడ్డిపై ఆయన తీవ్ర ఆరోపణలు చేశారు. కాంగ్రెసు అవినీతిపై, ముఖ్యమంత్రి రాజశేఖర రెడ్డి అవినీతిపై ఆయన విమర్శనాస్త్రాలు సంధించారు.

వైఎస్‌ అనుసరిస్తున్న ఓటుబ్యాంకు రాజకీయాల వల్ల కాశ్మీర్‌లో ఉన్న ఉగ్రవాదుల కన్నా పది రెట్లు హాని చేసే వారు జంటనగరాల్లో చేరిపోయారని నరేంద్ర మోడీ ఆరోపించారు. దేశంలో ఎక్కడ బాంబు పేలినా హైదరాబాద్‌తో సంబంధం ఉండడం ఇందుకు నిదర్శనమని అన్నారు. ఆంధ్రప్రదేశ్‌ సముద్రతీరంలో తాము గ్యాస్‌, పెట్రోల్‌ నిల్వలను వెలికి తీస్తే ఇక్కడి ప్రభుత్వం నిద్రపోయిందన్నారు. ఇక్కడ వెలికి తీసిన సహజసంపదపై ఇక్కడి ప్రజలకు హక్కుందని, దాన్ని తాము గౌరవిస్తామని స్పష్టం చేశారు. ఈ సమావేశంలో పార్టీ సీనియర్‌ నేతలు ప్రకాశ్‌ జవాదేకర్‌, బండారు దత్తాత్రేయ, బంగారు లక్ష్మణ్‌, ఇంద్రసేనారెడ్డి, బద్దం బాల్‌రెడ్డి, కిషన్‌రెడ్డి, చింతల రామచంద్రారెడ్డి, ఎమ్మెల్యే, ఎంపీ అభ్యర్థులు పాల్గొన్నారు.