జెసి తెలంగాణ ప్రకటన తప్పు: యాష్కీ

న్యూఢిల్లీ: రాష్ట్ర ప్రజలు సమైక్యాంధ్రకే పట్టం కట్టారని తమ పార్టీ నాయకుడు జెసి దివాకర్ రెడ్డి చేసిన ప్రకటనను కాంగ్రెస్ పార్టీ పార్లమెంటు సభ్యుడు మధుయాష్కీ ఖండించారు. జెసి ప్రకటన ముఖ్యమంత్రి డాక్టర్ వైయస్ రాజశేఖర రెడ్డి ప్రకటనకు విరుద్ధంగా ఉందని ఆయన గురువారం మీడియా ప్రతినిధులతో అన్నారు. తెలంగాణపై ప్రభుత్వం వేసిన రోశయ్య కమిటీ పని చేస్తుందని వైయస్ రాజశేఖర రెడ్డి చెప్పారని ఆయన గుర్తు చేశారు.

జెసి ప్రకటన పార్టీ విధానానికి విరుద్ధంగా కూడా ఉందని ఆయన అన్నారు. పార్టీ విధానానికి వ్యక్తిగత ఆలోచనలను కలపొద్దని ఆయన జెసి దివాకర్ రెడ్డికి సూచించారు. కాంగ్రెసు అభిమతం జెసి దివాకర్ రెడ్డి చెప్పిన మాటలకు భిన్నమైందని ఆయన అన్నారు. తెలంగాణపై తమ పార్టీ అధ్యక్షురాలు సోనియా గాంధీ చెప్పిందే అంతిమ నిర్ణయమని ఆయన అన్నారు.