నన్నెందుకు బదిలీ చేశారు? డిజిపి

హైదరాబాద్: ఎన్నికల సమయంలో తనను ఎందుకు బదిలీ చేశారో చెప్పాలంటూ రాష్ట్ర ఎన్నికల ప్రధాన అధికారి ఐ.వి.సుబ్బారావును రాష్ట్ర పోలీస్‌ డైరెక్టర్‌ జనరల్‌ ఎస్‌ ఎస్‌ పీ యాదవ్‌ వివరణ కోరారు. దీనిపై సీఈఓ సుబ్బారావు ఇచ్చిన వివరణపై సంతృప్తి చెందని డీజీపీ పూర్తి వివరాలు చెప్పాలంటూ మరో రెండు లేఖలు రాశారు. ఇటీవల జరిగిన సార్వత్రిక ఎన్నికల సందర్భంగా రాష్ట్ర ప్రభుత్వానికి అనుకూలమైన వ్యాఖ్యలు చేసిన డీజీపీ యాదవ్‌ పై సర్వత్రా విమర్శలు వెల్లువెత్తిన సంగతి తెలిసిందే. ఆ తర్వాత కొద్దిరోజులకు ఎన్నికల ఏర్పాట్లపై సీఈఓ ఉన్నతస్థాయి సమీక్ష సమావేశం నిర్వహిస్తుండగా, యాదవ్‌ విదేశీ పర్యటనకు వెళ్లారు.

దరిమిలా డీజీపీ పదవి నుంచి యాదవ్‌ను తప్పిస్తూ నిర్ణయం తీసుకుంది. ఆ స్థానంలో మహంతిని డీజీపీగా నియమించింది. ఎన్నికల అనంతరం కాంగ్రెస్‌ తిరిగి అధికారంలోకి రావడంతో యాదవ్‌ మళ్లీ డీజీపీగా పగ్గాలు చేపట్టారు. ఎన్నికల సమయంలో డీజీపీగా పక్కకు పెట్టిన ఉత్తర్వులు తనకు అందలేదని, ఆ వివరాలు తెలియజెప్పాల్సిందిగా ఇటీవల యాదవ్‌ సుబ్బారావుకు మొదట లేఖ రాశారు. దీనికి జవాబుగా డీజీపీకి కేంద్ర ఎన్నికల సంఘం పంపించిన ఉత్తర్వు ప్రతిని సీఈఓ కార్యాలయం పంపించింది. డీజీపీగా యాదవ్‌ ను తప్పించాలన్న తుది నిర్ణయం మాత్రమే అందులో ఉండడంతో..ఎందుకు తప్పించారో కారణాలు వెల్లడి చేయండంటూ డీజీపీ మరో లేఖ రాశారు. ఈసీ నుంచి వచ్చిన లేఖలో ఇంతకంటే వివరాలేమీ లేవని పేర్కొంటూ సీఈఓ కార్యాలయం బదులిచ్చింది. రెండో లేఖకు వచ్చిన సమాధానంపై కూడా సంతృప్తి చెందని డీజీపీ యాదవ్‌ మూడోలేఖ కూడా సంధించారు. సంతృప్తికరంగా అన్ని వివరణలు ఇచ్చాక కూడా తనని ఎందుకు తప్పించారు? ఆ వివరణలపై ఈసీకి మీరేమి కామెంట్స్‌ రాశారు? ఆ వివరాలన్నీ చెప్పండంటూ రెండు పేజీల లేఖను సీఈఓ సుబ్బారావుకు రాశారు. ఇంకా మూడో లేఖపై సీఈఓ కార్యాలయం స్పందించలేదు. ఒకట్రెండు రోజుల్లో జవాబివ్వనున్నట్లు తెలిసింది.