పోలీసుల అదుపులోనే ఎమ్మెల్యే: సబిత

హైదరాబాద్‌: పశ్చిమ గోదావరి జిల్లా నిడదవోలు తెలుగుదేశం శాసనసభ్యుడు టివి రామారావు పోలీసుల అదుపులోనే ఉన్నారని రాష్ట్ర హోం మంత్రి సబితా ఇంద్రారెడ్డి చెప్పారు. ఇంటి వద్ద ఉన్నా, స్టేషనులో ఉన్నా ఎమ్మెల్యే పోలీసుల అదుపులోనే ఉన్నారని ఆమె శుక్రవారం మీడియా ప్రతినిధులతో చెప్పారు. నిడదవోలు నర్సింగ్ కళాశాలలో విద్యార్థినిపై అత్యాచారం జరిపి ఆమెను హత్య చేశాడని టివి రామారావు ఆరోపణలు ఎదుర్కుంటున్నారు. ఈ సంఘటన గురించి తనకు నిన్ననే తెలిసిందని, ఘటనకు బాధ్యులైన వారు ఎంతటి పెద్దవారైనా ఉపేక్షించకూడదని పోలీసు అధికారులను ఆదేశించానని ఆమె వివరించారు.

హాస్టల్ గదిలో రక్తం మరకలు ఉన్నాయని చెబుతున్నారని, వాటిని సేకరించి పరీక్షలకు పంపాలని చెప్పినట్లు ఆమె తెలిపారు. హాస్టల్ లోని విద్యార్థినులను విచారించాలని ఆదేశించినట్లు ఆమె చెప్పారు. సాయంత్రంలోగా పూర్తి నివేదిక సమర్పించాలని పోలీసు అధికారులను ఆదేశించినట్లు కూడా ఆమె చెప్పారు. గుంటూరు జిల్లాలో జరిగిన యాసిడ్ దాడుల కేసులో కఠిన చర్యలు తీసుకుంటామని ఆయన చెప్పారు. యాసిడ్ దాడులను నిరోధించడానికి చట్టం తేనున్నట్లు ఆమె తెలిపారు.