తలసాని వ్యూహంతో బాబు కలవరం

హైదరాబాద్‌: తమ పార్టీ నాయకుడు తలసాని శ్రీనివాస యాదవ్ అనుసరిస్తున్న వ్యూహం తెలుగుదేశం పార్టీ అధ్యక్షుడు నారా చంద్రబాబునాయుడిని కలవరపరుస్తోంది. తలసాని కాంగ్రెసులో చేరడానికి కచ్చితంగా నిర్ణయం తీసుకున్నట్లు తెలుస్తోంది. అయినా వెంటనే ఆయన తెలుగుదేశం పార్టీని వీడకపోవడంలోని వ్యూహం, అనుసరిస్తున్న వైఖరి తెలుగుదేశం పార్టీని దెబ్బ తీయడానికేనని అంటున్నారు. తలసాని వ్యవహారంపై మంగళవారం సీనియర్ నేతలతో చర్చించిన చంద్రబాబు తన అభిప్రాయాలను వెల్లడించినట్లు తెలుస్తోంది. శ్రీనివాస యాదవ్ కు షోకాజ్ నోటీసు జారీ చేయాలని నిర్ణయించుకున్నట్లు సమాచారం.

గ్రేటర్ హైదరాబాద్ ఎన్నికలు సమీపిస్తున్న నేపథ్యంలో తెలుగుదేశం పార్టీని ఏదో మేరకు దెబ్బ తీయాలనేది తలసాని శ్రీనివాస్ ఎత్తుగడగా భావిస్తున్నారు. హైదరాబాద్ ప్రజలు సమైక్యాంధ్రకే సుముఖంగా ఉన్నారని చెప్పి, తెలుగుదేశం వైఖరిని తప్పు పట్టడమే కాకుండా అందుకు తగిన రుజువులు చూపించాలనేది ఆయన ప్రయత్నమట. హైదరాబాదులో తాను సర్వే చేయించానని, సమైక్యాంధ్రకే హైదరాబాదు ప్రజలు సుముఖంగా ఉన్నారని చెబుతూ ఒక సర్వే నివేదికను తలసాని శ్రీనివాస్ యాదవ్ విడుదల చేయడానికి సిద్ధమవుతున్నట్లు చెబుతున్నారు.