జానా, జెసిలకు మంత్రి పదవులు?

హైదరాబాద్: ముఖ్యమంత్రి వైయస్ రాజశేఖర రెడ్డి తమ మంత్రి వర్గాన్ని విస్తరించే అవకాశాలున్నట్లు ప్రచారం జరుగుతోంది. ఈ నెల 23వ తేదీన గానీ, 24వ తేదీన గానీ ఆయన తన మంత్రి వర్గాన్ని విస్తరిస్తారని అంటున్నారు. ఈ ప్రచారాన్ని కాంగ్రెస్ వర్గాలు ఖండించడం లేదు. అదే సమయంలో ధృవీకరించడం కూడా లేదు. రాజశేఖర రెడ్డి మంత్రి వర్గంలో ప్రస్తుతం 36 మంది ఉన్నారు. మంత్రి వర్గంలోకి ఇంకా ఆరుగురిని తీసుకునే అవకాశం ఉంది.

మంత్రి వర్గ కూర్పులో సీనియర్లు కె.జానారెడ్డిని, జెసి దివాకర్ రెడ్డిని పక్కన పెట్టి వైయస్ రాజశేఖర రెడ్డి అన్ని వర్గాలను ఆశ్చర్యానికి గురి చేశారు. అయితే వారిద్దరిని మంత్రి వర్గంలోకి తీసుకోవాలనే ఒత్తిడి వైయస్ పై పెరుగుతున్నట్లు సమాచారం. వారిద్దరు తీవ్ర అసంతృప్తితో ఉన్నట్లు తెలుస్తోంది. దీంతో వీరిద్దరికి మంత్రి వర్గంలో చోటు కల్పించడానికే ఆయన విస్తరణకు పూనుకుంటున్నట్లు చెబుతున్నారు. శాసనసభ బడ్జెట్ సమావేశాలు ముగిసిన తర్వాత ఈ విస్తరణ ఉండవచ్చునని తెలుస్తోంది.