ఇద్దరిని చంపి పోలీసు ఆత్మహత్య

రాయపూర్: ఛత్తీస్ ఘడ్ లోని బస్తర్ జిల్లాలో సాయుధ బలగాలకు చెందిన కానిస్టేబుల్ శనివారంనాడు ఇద్దరు సీనియర్లను హత్య చేసి తాను ఆత్మహత్య చేసుకున్నాడు. కానిస్టేబుల్ చేతిలో హతమైనవారిలో ప్లాటూన్ కమాండర్, హెడ్ కానిస్టేబుల్ ఉన్నారు. సిఎఎఫ్ 8వ బెటాలియన్ కు చెందిన ఎం.మింజ్ అనే కానిస్టేబుల్ బస్తర్ జిల్లాలోని కొండగావ్ ప్రాంతంలో విచాక్షణారహితంగా కాల్పులు జరిపాడు.

కాల్పులు జరిపిన అనంతరం అతను పారిపోయి చెట్టుకు ఉరివేసుకుని ఆత్మహత్య చేసుకున్నాడు. అతను జరిపిన కాల్పుల్లో ప్లాటూన్ కమాండర్ తికారాం లారియా, హెడ్ కానిస్టేబుల్ మెహతాబ్ సింగ్ ఠాకూర్ మరణించారు. మరో పోలీసు కానిస్టేబుల్ సంజయ్ సింగ్ గాయపడ్డాడు. సెలవు ఇవ్వడానికి నిరాకరించడంతో నిస్పృహకు గురైన మింజ్ ఈ దారుణానికి ఒడిగట్టినట్లు భావిస్తున్నారు.