ఆదికేశవులుపై టిటిడిలో తిరుగుబాటు

తిరుపతి: చైర్మన్ ఆదికేశవులు నాయుడిపై తిరుమల తిరుపతి దేవస్థానం (టిటిడి) పాలకమండలి సభ్యులు ఐదుగురు తిరుగుబాటు ప్రకటించారు. ఆదికేశవులు నాయుడిపై ఆరోపణలు చేస్తూ వారు మంగళవారం ఒక లేఖను ముఖ్యమంత్రి డాక్టర్ వైయస్ రాజశేఖర రెడ్డికి ఫాక్స్ చేశారు. చైర్మన్ తీసుకునే నిర్ణయాలను తాము వ్యతిరేకిస్తామని వారు చెప్పారు. చెవిరెడ్డి భాస్కర రెడ్డి, సత్యనారాయణ, ఆలూరు సుబ్రహ్మణ్యం, అంజయ్య, యాదయ్య తమ చైర్మన్ పై తిరుగుబాటు ప్రకటించారు.

టిటిడి అతిథి గృహాన్ని ఆదికేశవులు నాయుడు సొంత ప్రయోజనాలకు వాడుకుంటున్నారని, పాలకమండలి నిధులను దుర్వ్యినియోగం చేస్తున్నారని వారు ఆరోపించారు. పాలక మండలిని ఆదికేశవులు నాయుడు భ్రష్టు పట్టిస్తున్నారని, నిబంధనలు ఉల్లంఘించి వ్యవహరిస్తున్నారని వారన్నారు. ఏకపక్ష నిర్ణయాలు తీసుకుంటున్నారని వారు చెప్పారు. భక్తుల మనోభావాలను దెబ్బ తీసే విధంగా వ్యవహరిస్తూ సొంత ఎజెండాతో ఆదికేశవులు నాయుడు పని చేస్తున్నారని వారు ఆరోపించారు.