బిజెపి లుకలుకలు లేవు: వెంకయ్య

న్యూఢిల్లీ: తమ పార్టీలో లుకలుకలు లేవని భారతీయ జనతా పార్టీ (బిజెపి) సీనియర్ నేత ఎం. వెంకయ్యనాయుడు స్పష్టం చేశారు. బిజెపిలో సంక్షోభం నెలకొందనే వార్తలను ఆయన శనివారం ఖండించారు. పార్టీ నాయకత్వ మార్పు గురించి, వారసత్వం గురించి చర్చించినట్లు వచ్చిన వార్తల్లో నిజం లేదని ఆయన మీడియా ప్రతినిధులతో అన్నారు. నాయకత్వ మార్పుపై, వారసత్వం గురించి చర్చించినట్లు వచ్చిన వార్తలన్నీ మీడియా సృష్టేనని ఆయన అన్నారు.

పార్టీ నాయకత్వాన్ని మార్చనున్న వస్తున్న వార్తలను బిజెపి అధికార ప్రతినిధి ప్రకాష్ జవేదకర్ ఖండించారు. దీనిపై ఇప్పటి వరకు ఏ విధమైన నిర్ణయం తీసుకోలేదని ఆయన శనివారం మీడియా ప్రతినిధులతో అన్నారు. మహారాష్ట్ర శాసనసభకు జరిగే ఎన్నికల్లో పార్టీ ప్రచారానికి అద్వానీ నాయకత్వం వహిస్తారని ఆయన చెప్పారు.