ప్రాజెక్టులపై టిడిపి ఎమ్మెల్యేల ధర్నా

హైదరాబాద్: కృష్ణా, గోదావరి నదులపై కర్నాటక, మహారాష్ట్ర ప్రభుత్వాలు నిర్మిస్తున్న అక్రమ సాగునీటి ప్రాజెక్టులను అడ్డుకోవాలని ప్రభుత్వాన్ని డిమాండ్ చేస్తూ తెలుగుదేశం పార్టీ శాసనసభ్యులు మరోసారి ధర్నా చేశారు. మంగళవారం ఉదయం వారు శాసనసభ ఎదురుగా గల గన్ పార్కు వద్ద ధర్నా చేశారు. నీటి వాటాలో ఆంధ్రప్రదేశ్ అన్యాయం జరగకుండా చర్యలు తీసుకోవాలని వారు ప్రభుత్వాన్ని కోరారు. ఈ ధర్నాకు వామపక్షాలు మద్దతు తెలిపాయి.

పొరుగు రాష్ట్రాల ప్రాజెక్టులను అడ్డుకోవడానికి రాష్ట్ర ప్రభుత్వం తగిన చర్యలు తీసుకోవడం లేదని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్శించారు. దీంతో రాష్ట్రంలోని రైతులు నష్టపోతున్నారని, ఎక్కడా పంటలు సరిగా పండని స్థితి ఏర్పడిందని ఆయన అన్నారు. లైంగిక వేధింపుల కేసులో ఇరుక్కున్న తమ శాసనసభ్యుడు టీవీ రామారావు విషయంలోనూ శాసనసభలో తగిన న్యాయం జరగలేదని ఆయన అన్నారు. శాసనసభ సమావేశాలు మంగళవారం ముగుస్తున్నాయి.