కాంగ్రెస్ ఎమ్మెల్యేలకు 'చిరు' తిరస్కరణ

హైదరాబాద్: హెలికాప్టర్ ప్రమాదంలో మరణించిన ముఖ్యమంత్రి డాక్టర్ వైయస్ రాజశేఖర రెడ్డి తనయుడు వైయస్ జగన్మోహన్ రెడ్డిని ముఖ్యమంత్రిని చేయడానికి సహకరించాలని కోరడానికి ప్రజారాజ్యం పార్టీ అధినేత చిరంజీవి వద్దకు వెళ్లిన కాంగ్రెసు పార్టీ శాసనసభ్యులకు చేదు అనుభవం ఎదురైంది. ఇంతటి విషాదకరమైన సమయంలో ముఖ్యమంత్రి పదవి గురించి మాట్లాడడం సరైన చర్య కాదని చిరంజీవి వారితో అన్నారు.

వైయస్ జగన్మోహన్ రెడ్డిని ముఖ్యమంత్రిని చేయాలనే ఉద్దేశంతో గురువారం మధ్యాహ్నం నుంచి కొంత మంది కాంగ్రెసు నాయకులు లాబీయింగ్ ప్రారంభించారు. ఇందులో భాగంగా కొంత మంది కాంగ్రెసు శాసనసభ్యులు చిరంజీవి వద్దకు వెళ్లారు. కొంత మంది మంత్రులు టీవీ చానెళ్ల కెమెరాల ముందు నిలబడి వరుసగా వైయస్ జగన్మోహన్ రెడ్డిని ముఖ్యమంత్రి చేయాలని చెబుతూ వచ్చారు.