బోరున విలపించిన డిఎస్

హైదరాబాద్: వైయస్ రాజశేఖర రెడ్డి భౌతిక కాయాన్ని తొలుత ముఖ్యమంత్రి క్యాంపు కార్యాలయం నుంచి కాంగ్రెసు పార్టీ కార్యాలయం గాంధీ భవన్ కు తరలించారు. అక్కడ పార్టీ నేతలు వైయస్ కు నివాళులర్పించారు.ముఖ్యమంత్రి భౌతిక కాయాన్ని చూసి ప్రదేశ్ కాంగ్రెసు కమిటీ (పిసిసి) అధ్యక్షుడు డి శ్రీనివాస్ బోరున విలపించారు. తామిద్దరిదీ మంచి జోడీ అని, కాంగ్రెసుకు విజయం చేకూర్చి పెట్టే జోడీ అని ఎప్పుడూ చెప్పుకుంటూ ఉండేవారు. అ తర్వాత ఎల్బీ స్టేడియానికి తరలించారు. హెలికాప్టర్ ప్రమాదంలో మరణించిన ముఖ్మయంత్రి డాక్టర్ వైయస్ రాజశేఖర రెడ్డి భౌతిక కాయాన్ని శుక్రవారం ఉదయం హైదరాబాదులోని లాల్ బహదూర్ స్టేడియంలో ప్రజల సందర్శనార్థం ఉంచారు. ఆయనను చివరి సారిగా చూడడానికి వేలాదిగా ప్రజలు తరలి వస్తున్నారు. దీంతో హైదరాబాదులో పలు చోట్ల ట్రాఫిక్ ను మళ్లించారు. వైయస్ భౌతిక కాయాన్ని సందర్శించడానికి ప్రజలు ఎల్పీ స్టేడియం వద్ద బారులు తీరారు.

శుక్రవారం మధ్యాహ్నం ఒంటి గంట వరకు ఆయన భౌతిక కాయాన్ని ఎల్బీ స్టేడియంలో ఉంచుతారు. ఆ తర్వాత ఆయన స్వగ్రామం పులివెందులకు తరలిస్తారు. ఇడుపులపాయ ఎస్టేట్ లో ఆయన భౌతిక కాయానికి అంత్యక్రియలు జరుగుతాయి. ఎల్బీ స్టేడియంలో దృశ్యాలను చూసేలా లైవ్ స్క్రిన్ ఏర్పాటు చేశారు.వైయస్ సందర్శనార్థం వచ్చే వారి కోసం ప్రత్యేక బస్సులు ఏర్పాటు చేశారు. రైళ్లకు అదనపు బోగీలను సమకూర్చారు. ఎల్బీ స్టేడియంలో ముఖ్యమంత్రి రాజశేఖర రెడ్డికి నివాళులర్పించాడనికి సినీ ప్రముఖులు కూడా ఉన్నారు.