చాపర్ క్రాష్ పై సిబిఐ దర్యాప్తు షురూ

కర్నూలు: రాష్ట్ర ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్ ప్రమాదంపై కేంద్ర దర్యాప్తు సంస్థ (సిబిఐ) దర్యాప్తు ప్రారంభించింది. సిబిఐ డిప్యూటీ ఇన్ స్పెక్టర్ జనరల్ వివి లక్ష్మీనారాయణ నేతృత్వంలోని సిబిఐ బృందం శనివారంనాడు ప్రమాదం సంభవించిన నల్లమల అడవుల్లోని పావురాలగుట్ట స్థలాన్ని సందర్శించింది. హెలికాప్టర్ శకలాలను ఫొరెన్సిక్ నిపుణులు క్షుణ్నంగా పరిశీలించారు. సిబిఐ పరిశీలించిన తర్వాత హెలికాప్టర్ శకలాలను అక్కడి నుంచి తొలగిస్తామని కర్నూలు ఎస్పీ శ్రీకాంత్ చెప్పారు.

ప్రమాదంలో విద్రోహ చర్య ఏదీ లేదని సిబిఐ ఒక నిర్ధారణకు వచ్చినట్లు సమాచారం. కాగా, తాము నిజాలను వెలికి తీస్తామని లక్ష్మీనారాయణ అన్నారు. దర్యాప్తు విషయాలను అన్నింటినీ ఇప్పుడే బయట పెట్టలేమని ఆయన మీడియా ప్రతినిధులతో అన్నారు. వైయస్ హెలికాప్టర్ ప్రమాదంపై దర్యాప్తును రాష్ట్ర ప్రభుత్వం సిబిఐకి అప్పగించిన విషయం తెలిసిందే. లక్ష్మీనారాయణతో పాటు సిబిఐ ఎస్పీ నాగేశ్వరరావు తదితరులు బృందంలో ఉన్నారు.