ప్రయాణికులను వదిలేసిన ఫ్లైట్

కోల్ కత్తా: పోర్ట్ బ్లెయిర్ కు చెందిన ఎయిర్ ఇండియా విమానం శనివారంనాడు 25 మంది ప్రయాణికులను వదిలేసి వెళ్లిపోయింది. దీంతో ప్రయాణికులు ఆందోళనకు దిగారు. టికెట్లు ఉన్నప్పటికీ సీట్లు లేకపోవడంతో ఆ విమానం వారిని వదిలేసింది. సాధారణంగా 145 సీట్లున్న విమానాన్ని ఈ మార్గంలో నడుపుతున్నారు. అయితే శనివారం 120 సీట్లున్న విమానాన్ని వినియోగించారు. దీంతో మిగతా ప్రయాణికులకు చోటు లేకుండా పోయిందని ఎయిర్ ఇండియా అధికారులు చెప్పారు.

కోల్ కత్తా - పోర్ట్ బ్లెయిర్ విమానం శనివారం ఉదయం 5 గంటల 35 నిమిషాలకు ఎన్ఎస్సీ బోస్ అంతర్జాతీయ విమానాశ్రయం నుంచి బయలుదేరింది. తమను వదిలేయడంతో ప్రయాణికులు విమానాశ్రయంలో ఆందోళనకు దిగారు. వదిలేసిన కొద్ది మంది ప్రయాణికులను జెట్ లైట్ విమానంలో పోర్ట్ బ్లెయిర్ కు పంపిస్తామని ఎయిర్ ఇండియా అధికారులు చెప్పారు. మిగతా వారికి హోటల్లో వసతి కల్పించి, వారిని ఆదివారం పంపిస్తామని వారు చెప్పారు.