కెసిఆర్ వి అవేం మాటలు: శోభ

కర్నూలు: రాయలసీమ నీటి పారుదల ప్రాజెక్టులపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చేసిన విమర్శలను ప్రజారాజ్యం శాసనసభా సభ్యురాలు శోభా నాగిరెడ్డి ఖండించారు. పోతిరెడ్డి పాడు ప్రాజెక్టుపై కెసిఆర్ చేసిన వ్యాఖ్యలు అర్థరహితమైనవని ఆమె శనివారం మీడియా ప్రతినిధులతో అన్నారు. శ్రీశైలం ప్రాజెక్టు పూర్తి స్థాయి నీటి మట్టాన్ని 854 అడుగులుగా ఎప్పుడో నిర్ణయించారని, ఈ విషయంలో కెసిఆర్ చేసే వ్యాఖ్యలు సరైనవి కావని ఆమె అన్నారు.

రాయలసీమ నిర్మిస్తున్న ప్రాజెక్టులను కెసిఆర్ అక్రమ ప్రాజెక్టులని అంటున్నారని, ఇవన్నీ తెలుగుదేశం ప్రభుత్వ హయాంలోనే ప్రారంభమయ్యాయని ఆమె అన్నారు. అప్పుడు మాట్లాడని కెసిఆర్ ఇప్పుడెందుకు మాట్లాడుతున్నారని ఆమె ప్రశ్నించారు. వరద ప్రమాదంతో ప్రజలు అల్లాడుతున్న సమయంలో ఇటువంటి రాజకీయాలు చేయడం తగదని ఆమె అన్నారు.