మాజీ సిఎం మదు కోడా ఆరోగ్యం మెరుగు

రాంచీ: హవాలా ఆరోపణలు ఎదుర్కొంటున్న జార్ఖండ్‌ మాజీ ముఖ్యమంత్రి మదు కోడాను డిశ్చార్జ్‌ చేసే ముందు తమకు సమాచారం ఇవ్వాలని ఆదాయపు పన్ను, ఎన్‌ఫోర్స్‌మెంట్‌ శాఖలు ఆస్పత్రి వర్గాలను ఆదేశించాయి. తీవ్రమైన కడుపు నొప్పి, అధిక రక్తపోటుతో ఐసీయూలో చేరిన మదుకోడా ఆరోగ్య పరిస్థితి మెరుగు కావడంతో ఆయనను సాధారణ వార్డుకు తరలించారు.

రూ. 2 వేల కోట్ల మేర అక్రమాలకు పాల్పడ్డారంటూ ఆరోపణలు ఎదుర్కొంటున్న కోడా రాంచీలోని వీవర్స్‌ మెమోరియల్‌ ఆస్పత్రిలో చికిత్స పొందుతున్నారు. అనారోగ్యం నుంచి మదుకోడా కోలుకున్న వెంటనే విచారణ కొనసాగిస్తామని ఐటీ అధికారులు బుధవారం రాత్రి ప్రకటించారు. మదు కోడాకు నోయిడా పారిశ్రామిక వాడలో కొన్ని వందల్ కోట్ల విలువ చేసే ఆస్ధి ఉన్నట్టు తాజా దర్యాప్తులో వెల్లడయింది.