ఓబుళాపురం అక్రమాలు 10 వేల కోట్లు: బాబు

హైదరాబాద్: ఓబుళాపురం తవ్వకాల్లో 10 వేల కోట్ల రూపాయల మేరకు అక్రమాలు జరిగాయని తెలుగుదేశం పార్టీ అధ్యక్షుడు నారా చంద్రబాబు నాయుడు ఆరోపించారు. ఉన్నతాధికారులపై దాడులు చేస్తున్నా ప్రభుత్వం కళ్లప్పగించి చూస్తోందని, ఓబుళాపురం అక్రమాలపై మీనమేషాలు లెక్కిస్తోందని ఆయన మంగళవారం మీడియా ప్రతినిధుల సమావేశంలో విమర్శించారు. గనుల మాఫియా నుంచి రక్షించకపోతే దేశానికి ప్రమాదం వాటిల్లుతుందని ఆయన ఆందోళన వ్యక్తం చేశారు. రాష్ట్ర సంపదను కొల్లగొడుతున్నవారి నుంచి రక్షించడానికి పోరాటాలు చేస్తామని, ఇందులో భావసారూప్య పార్టీలను కలుపుకుని పోతామని ఆయన చెప్పారు.

రాష్ట్రంలో ఓబుళాపురం మైనింగ్ కంపెనీ కార్యకలాపాలను నిలిపేయాలని ఆయన ప్రభుత్వాన్ని డిమాండ్ చేశారు. ఓబుళాపురం గనుల వ్యవహారంలో రెడ్ గోల్డ్, ఆర్ఆర్ గ్లోబల్ పాత్రపై విచారణ జరిపించాలని ఆయన కోరారు. భారీగా అక్రమాలు జరుగుతున్నా కేంద్ర, రాష్ట్ర ప్రభుత్వాలు పట్టించుకోవడం లేదని ఆయన విమర్శించారు. ఇంత అక్రమాలు జరుగుతుంటే ప్రధాని మన్మోహన్ సింగ్ ఏం చేస్తున్నారని ఆయన ప్రశ్నించారు. ప్రభుత్వాలు గనుల మాఫియా చేతుల్లో కీలుబొమ్మలుగా మారుతున్నాయని ఆయన వ్యాఖ్యానించారు.