పట్టాలు తప్పిన రైలు: 5గురు మృతి

జైపూర్: మాండోర్ ఎక్స్ ప్రెసు రైలుకు చెందిన 15 కోచ్ లు పట్టాలు తప్పడంతో ఐదుగురు మరణించారు. మరో 20 మంది తీవ్రంగా గాయపడ్డారు. న్యూఢిల్లీకి చెందిన ఈ రైలు శనివారం తెల్లవారు జామున ఒంటి గంటన్నర సమయంలో బాన్స్ కా ఫాఠక్ వద్ద పట్టాలు తప్పింది. జోధ్ పూర్, న్యూఢిల్లీ మధ్య నడిచే ఈ రైలుకు చెందిన ఐదు ఎసి, ఏడు స్లీపర్, మూడు జనరల్ కోచ్ లు పట్టాలు తప్పినట్లు ఉత్తర, పశ్చిమ రైల్వే సిపిఆర్ఓ చెప్పారు.

ఒక ఎసి కోచ్ పూర్తిగా బోల్తా పడింది. గాయపడిన వారిని సమీపంలోని ఆస్పత్రులకు తరలించారు. పట్టాలు తప్పిన కోచ్ ల్లోకి వెళ్లడానికి జిఆర్పీ సిబ్బంది హైడ్రాలిక్ కట్టర్స్ ను వాడుతున్నారు. అయితే నలుగురు మాత్రమే మరణించారని, 21 మంది గాయపడ్డారని జైపూర్ కలెక్టర్ కులదీప్ రాంకా చెబుతున్నారు. జైపూర్, న్యూఢిల్లీ, ఆగ్రాలకు ప్రయాణికులను చేరవేయడానికి సహాయక రైలు అక్కడికి బయలుదేరింది. బస్సులను కూడా వాడుతున్నారు.