గ్రేటర్ ఎన్నికలు: మందకొడిగా వోటింగ్

హైదరాబాద్: గ్రేటర్ హైదరాబాద్ ఎన్నికల్లో సోమవారం ఉదయం వోటింగ్ మందకొడిగా ప్రారంభమైంది. పోలింగ్ బూత్ ల వద్ద ప్రజలు కనిపించడం లేదు. అప్పుడప్పుడు ఒక్కరో ఇద్దరో వోట్లు వేసి వెళ్లిపోతున్నారు. ప్రముఖులు నివాసం ఉండే బంజారాహిల్స్, జూబిలీ హిల్స్ ప్రాంతాల్లో కూడా పోలింగ్ ఊపందుకోలేదు. ఉదయం పది గంటల తర్వాత పోలింగ్ పెరుగుతుందని భావిస్తున్నారు. హైదరాబాదులో రెండు రోజులుగా చలి తీవ్రంగా ఉంది. దీంతో ఉదయం ఓటర్లు పోలింగ్ బూతులకు తరలిరావడం లేదని భావిస్తున్నారు.

కాగా, సిపిఎం రాష్ట్ర కార్యదర్శి బివి రాఘవులు గాంధీ నగర్ లో తన ఓటు హక్కును వినియోగించుకున్నారు. పోలింగ్ బూతుల్లో ఉదయం తొమ్మిది గంటల వరకు చాలా చోట్ల 20, 30 ఓట్లు మాత్రమే పోలయ్యాయి. దీన్ని బట్టి పోలింగ్ ఎంత మందకొడిగా జరుగుతోందనే విషయాన్ని అర్థం చేసుకోవచ్చు. కొన్ని చోట్ల ఇవియంలు మొరాయించాయి. హిమాయత్ నగర్ లోని రెండు చోట్ల ఇవియంలు చాలా సేపు పనిచేయలేదు. దీంతో వోటింగ్ ఆగిపోయింది.