పోలవరంపై సుప్రీంకోర్టు నోటీసులు జారీ

న్యూఢిల్లీ: గోదావరి నదిపై ఆంధ్రప్రదేశ్ ప్రభుత్వం తలపెట్టిన పోలవరం ప్రాజెక్టుకు జాతీయ హోదా కల్పించడంపై సుప్రీంకోర్టు శుక్రవారం కేంద్ర, రాష్ట్ర ప్రభుత్వాలకు నోటీసులు జారీ చేసింది. తమ నోటీసులకు నాలుగు వారాల్లోగా సమాధానం ఇవ్వాలని సుప్రీంకోర్టు ఆదేశించింది. పోలవరం ప్రాజెక్టును జాతీయ హోదా కల్పించడాన్ని సవాల్ చేస్తూ ఒరిస్సా ప్రభుత్వం సుప్రీంకోర్టులో పిటిషన్ దాఖలు చేసింది. దీన్ని కోర్టు విచారణకు స్వీకరించింది.

పోలవరం ప్రాజెక్టుకు జాతీయ హోదా ఇచ్చే విషయంలో మాత్రమే కేంద్ర మంత్రి వర్గ ఆమోదం ఒక్కటే మిగిలి ఉందని, ఇతర అనుమతులన్నీ లభించాయని కేంద్ర జలవనరుల శాఖ మంత్రి గురువారం తెలిపారు. ఆ స్థితిలో దాన్ని సవాల్ చేస్తూ ఒరిస్సా సుప్రీంకోర్టులో పిటిషన్ దాఖలు చేసింది. పోలవరం వల్ల తమ రాష్ట్రంలోని పలు ప్రాంతాలు ముంపునకు గురవుతాయని ఒరిస్సా ప్రభుత్వం అభ్యంతరం చెబుతోంది. ఈ ప్రాజెక్టును దివంగత ముఖ్యమంత్రి వైయస్ రాజశేఖర రెడ్డి ప్రతిష్టాత్మకంగా తీసుకున్నారు.