తెలంగాణ కోసం నేనూ ప్రయత్నిస్తున్నా: వి హనుమంతరావు

హైదరాబాద్: తెలంగాణ రాష్ట్ర ఏర్పాటుకు తానూ ప్రయత్నిస్తున్నానని కాంగ్రెసు రాజ్యసభ సభ్యుడు వి హనుమంతరావు చెప్పారు. విద్యార్థులు శుక్రవారం ఉదయం హనుమంతరావు ఇంటిని ముట్టడించారు. తెలంగాణ అంశాన్ని కాంగ్రెసు అధ్యక్షురాలు సోనియా దృష్టికి తీసుకెళ్లాలని విద్యార్థులు డిమాండ్ చేశారు. ఈ పార్లమెంటు సమావేశాల్లోనే తెలంగాణ బిల్లు పెట్టాలని విద్యార్థులు నినాదాలు చేశారు. తాను తెలంగాణ కోసం ప్రయత్నిస్తున్నానని వి. హనుమంతరావు వారితో చెప్పారు. విహెచ్ కు విద్యార్థులు వినతి పత్రం ఇచ్చారు. సోమవారం సోనియా గాంధీతో అపాయింట్ మెంటు ఉందని, కాంగ్రెసు అధిష్టానం తెలంగాణకు అనుకూలంగా ఉందని విహెచ్ చెప్పారు. 12 మంది ఎంపీలు కూడా తెలంగాణకు అనుకూలంగా ఉన్నారని ఆయన చెప్చారు. దీంతో విద్యార్థులు వెనక్కి మళ్లారు.

తెలంగాణ అంతటా శుక్రవారం కూడా ఆందోళనలు సాగుతున్నాయి. విద్యాసంస్థలకు రాష్ట్ర ప్రభుత్వం 15 రోజులు సెలవులు ప్రకటించింది. మందవర్రిలో ఎంపిడివో కార్యాలయాన్ని ఆందోళనకారులు దగ్ధం చేశారు. వరంగల్ లో శుక్రవారం ఆటోల బంద్ తలపెట్టారు. తెలంగాణ మట్టి మనుషుల ఫోరం ఇటాలియన్ భాషలో సోనియా గాంధీకి లేఖ రాసింది. తెలంగాణ ఇచ్చే వరకు కాంగ్రెసు నాయకుల ఇళ్లలో బట్టలు ఉతక వద్దని ఖమ్మం జిల్లాలోని ఇల్లందులోని రజక సంఘం నిర్ణయించింది.