కెసిఆర్ కోమాలో లేరు: నిమ్స్ డైరెక్టర్

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె.చంద్రశేఖర రావు కోమాలో లేరని నిజాం వైద్య విజ్ఞాన సంస్థ (నిమ్స్) డైరెక్టర్ డాక్టర్ ప్రసాదరావు స్పష్టం చేశారు. కెసిఆర్ ఆరోగ్యంపై వదంతులు నమ్మవద్దని ఆయన కోరారు. కెసిఆర్ క్షేమంగా ఉన్నారని, స్పృహలోనే ఉన్నారని, మాట్లాడుతున్నారని ఆయన వివరించారు. కెసిఆర్ లివర్ చెడిపోయినట్లు వచ్చిన వార్తల్లో కూడా నిజం లేదని ఆయన చెప్పారు. ఆహారం తీసుకోకపోవడం వల్ల కెసిఆర్ నీరసంగా ఉన్నారని ఆయన చెప్పారు.

కెసిఆర్ ను పరామర్శించడానికి సిపిఎం రాష్ట్ర కార్యదర్శి బివి రాఘవులు వచ్చారు. బివి రాఘవులును నిమ్స్ వద్ద విద్యార్థులు చుట్టుముట్టి జైతెలంగాణ నినాదం చేయాలని పట్టుబట్టారు. ఆయన మెడపై తెరాస జెండా వేశారు. సీనియర్ జర్నలిస్టు రామచంద్ర మూర్తి, ప్రొఫెసర్ హరగోపాల్, చుక్కా రామయ్య కూడా కెసిఆర్ ను పరామర్సించారు. వెంటనే తెలంగాణ సమస్యలను పరిష్కరించాలని పిసిసి సభ్యులు తమ కాంగ్రెసు పార్టీ అధిష్టానాన్ని కోరారు. కాగా, తెరాస ఇచ్చిన బంద్ పిలుపుకు అన్ని ప్రతిపక్షాలు మద్దతు ప్రకటించాయి.