17 మంది మంత్రుల మంత్రులు రాజీనామా

హైదరాబాద్: రాష్ట్ర విభజనకు నిరసనగా రాయలసీమ, కోస్తాంధ్ర ప్రాంతాలకు చెందిన 17 మంది మంత్రులు రాజీనామా చేశారు. తమ అభిప్రాయాన్ని ముఖ్యమంత్రి కె. రోశయ్యనకు వివరించడానికి తమ తరఫున మంత్రులు ధర్మాన ప్రసాదరావు, శిల్పా మోహన్ రెడ్డి, గాదె వెంకటరెడ్డిలను పంపినట్లు మంత్రి ఆనం రామనారాయణ రెడ్డి మీడియా ప్రతినిధులకు చెప్పారు. మంత్రుల రాజీనామాల విషయాన్ని చర్చించే బాధ్యతను రోశయ్య హోం మంత్రి సబితా ఇంద్రారెడ్డికి, రెవెన్యూ మంత్రి ధర్మాన ప్రసాదరావుకు అప్పగించారు. రాయలసీమ, కోస్తాంధ్ర మంత్రులు శనివారంనాడు హైదరాబాదులోని ఒక స్టార్ హోటల్లో సమావేశమయ్యారు. ఏ ఉద్యమమైనా ప్రశాంతంగా జరగాలని సబితా ఇంద్రారెడ్డి అన్నారు. విద్యార్థులు, యువకులు ప్రశాంతంగా ఉద్యమం జరపాలని ధర్నాన అన్నారు. మొత్తం రాయలసీమ, కోస్తాంధ్ర 23 మంది మంత్రులు కూడా రాజీనామాకు సిద్ధపడ్డారు.

తమ ప్రాంతాల ప్రజలు, తమ శాసనసభ్యుల ఒత్తిడి మేరకు తాము రాజీనామా చేస్తున్నట్లు ఆనం రామనారాయణ రెడ్డి తెలిపారు. కోస్తా, రాయలసీమ ప్రాంతాల్లో అన్ని పార్టీల నాయకులు, విద్యార్థులు, మేధావులు, కళాకారులు అందరూ ఉద్వేగానికి లోనయ్యారని ఆయన అన్నారు. ప్రజాభిప్రాయం మేరకు శాసనసభ్యులు, శాసనమండలి సభ్యులు రాజీనామాలు చేశారని, తాము కూడా ఈ స్థితిలో రాజీనామాలు చేయాలని నిర్ణయించుకున్నామని ఆయన చెప్పారు. తెలంగాణపై దివంగత ముఖ్యమంత్రి వైయస్ రాజశేఖర రెడ్డి చేసిన ప్రకటనకు తాము కట్టుబడి ఉంటామని, ఎఐసిసి ఆమోదంతోనే వైయస్ గతంలో ఆ ప్రకటన చేసి ఉంటారని భావిస్తున్నామని ఆయన చెప్పారు. తాము సమైక్యాంధ్ర ఉద్యమంలో పాల్గొనాలని నిర్ణయించుకున్నట్లు ఆయన తెలిపారు.

ఈ తాజా పరిణామంతో తెలంగాణ మంత్రులు కీలక మంతనాల్లో మునిగిపోయారు. తెలుగుదేశం పార్టీ పరిస్థితిని గమనిస్తోంది. ఆ సంక్షోభాన్ని పరిష్కరించాల్సింది కేంద్రమేనని ముఖ్యమంత్రి రోశయ్య అన్నారు.