ప్రాంతాలవారీగా మంత్రివర్గంలో చీలిక

హైదరాబాద్: ముఖ్యమంత్రి కె.రోశయ్య మంత్రివర్గం నిట్టనిలువునా ప్రాంతాలవారీగా చీలింది. తెలంగాణేతర, తెలంగాణ మంత్రులు శనివారం విడివిడిగా సమావేశమయ్యారు. తెలంగాణ రాష్ట్ర మంత్రులు కాంగ్రెసు పార్టీ అధిష్టానం నిర్ణయానికి తెలంగాణ రాష్ట్ర ఏర్పాటు విషయంలో కట్టుబడి ఉంటామని మొదటి నుంచి ప్రకటిస్తూ వస్తున్నారు.తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు దీక్ష నేపథ్యంలో తలెత్తిన ఉద్యమంతో తెలంగాణ రాష్ట్ర ఏర్పాటుకు నిర్ణయం తీసుకోవాలని పార్టీ అధిష్టానాన్ని కోరుతూ లేఖ రాశారు. కాగా, తెలంగాణ రాష్ట్ర ఏర్పాటుకు ప్రక్రియ ప్రారంభిస్తామని కేంద్ర హోం మంత్రి చిదంబరం ప్రకటన వెలువడగానే కోస్తా, రాయలసీమ మంత్రులు తీవ్ర నిరసన వ్యక్తం చేస్తూ ఆందోళనలకు శ్రీకారం చుట్టారు.

తెలంగాణ, తెలంగాణేత మంత్రుల మధ్య భావోద్వేగపరమైన చీలిక కూడా వచ్చింది. ఈ స్థితిలో ఇరు ప్రాంతాల మంత్రులు కలిసి పని చేయలేని వాతావరణం ఏర్పడింది. దీంతో శనివారం మంత్రివర్గం నిట్టనిలువునా చీలి వేర్వేరుగా సమావేశమయ్యారు. ఈ స్థితిలో ముఖ్యమంత్రి రోశయ్య ముందు జాగ్రత్తగా గవర్నర్ ఎన్డీ తివారీని కలిసే అవకాశం ఉంది. శనివారం ఉదయం రోశయ్యతో శాసన మండలి చైర్మన్ చక్రపాణి కలిశారు. శాసనసభ్యుల రాజీనామా నేపథ్యంలో శాసనసభను గానీ మండలిని గానీ సజావుగా నడిపించే స్థితి లేకుండా పోయింది. దీంతో ఏం చేయాలనే విషయంపై వారిద్దరి మధ్య మంతనాలు జరిగాయి. రోశయ్యతో కొంత మంది ఆంధ్ర మంత్రులు కూడా సమావేశమయ్యారు.