తెలంగాణ లొల్లికి ముగింపు తెలియదు: చిదంబరం

న్యూఢిల్లీ: తెలంగాణ వివాదం ఎప్పుడు ముగుస్తుందో తెలియదని కేంద్ర హోం మంత్రి పి. చిదంబరం అన్నారు. దానికి కాల పరిమితి ఏదీ లేదని ఆనయ చెప్పారు. తెలంగాణ రాష్ట్ర ఏర్పాటు ప్రక్రియ వివాదం ఎప్పుడు తేలుతుందనే విషయం తనకు తెలియదని ఆయన అన్నారు. పార్లమెంటు వెలుపల మీడియా ప్రతినిధులు వేసిన ప్రశ్నలకు ఆయన శుక్రవారం సమాధానమిచ్చారు. తెలంగాణ అనుకూల, వ్యతిరేక నినాదాలతో గొడవ జరుగుతుండడంతో స్పీకర్ మీరా కుమార్ లోకసభను నిరవధికంగా వాయిదా వేశారు.

నిరవధిక వాయిదాను పార్లమెంటరీ వ్యవహారాల మంత్రి పవన్ కుమార్ బన్సాల్ సమర్థించుకున్నారు. నిరంతరంగా అంతరాయాలతో సభను నడపడం సాధ్యం కాదని ఆయన అన్నారు. తెలంగాణ రాష్ట్ర ఏర్పాటుకు ప్రక్రియను ప్రారంభిస్తామని ఈ నెల 9వ తేదీన చిదంబరం ప్రకటన చేసిన మర్నాటి నుంచి రాష్ట్రంలో సమైక్యాంధ్ర మొదలైంది. తెలుగుదేశం శాసనసభ్యులు ప్రభుత్వ వివరణకు పట్టుబడుతూ సభను స్తంభింపజేస్తూ వస్తున్నారు.