లగడపాటి ఇద్దరు భార్యలనే చూసుకోలేరు: పాల్వాయి

హైదరాబాద్: తమ పార్టీ పార్లమెంటు సభ్యుడు లగడపాటి రాజగోపాల్ ఇద్దరు భార్యలనే సరిగా చూసుకోలేరని, అటువంటి లగడపాటి రాష్ట్ర గురించి మాట్లాడుతున్నారని కాంగ్రెసు సీనియర్ నాయకుడు పాల్వాయి గోవర్దన్ రెడ్డి వ్యాఖ్యానించారు. లగడపాటి రాజగోపాల్ తమ పార్టీ అధ్యక్షురాలు సోనియా గాంధీని, పిసిసి అధ్యక్షుడు డి. శ్రీనివాస్ ను ధిక్కరిస్తున్నారని ఆయన శనివారం మీడియా ప్రతినిధులతో అన్నారు. పార్టీ నిర్ణయాన్ని ధిక్కరిస్తున్న లగడపాటి పార్టీలో ఉండడానికి అనర్హులని ఆయన అభిప్రాయపడ్డారు.

తెలంగాణ ప్రాజెక్టులను విస్మరించి ఆంధ్ర ప్రాజెక్టులను చేపడితే సహించబోమని ఆయన అన్నారు. నాబార్డు నిధుల కేటాయింపుల్లో తెలంగాణకు అన్యాయం జరిగిందని ఆయన విమర్శించారు. జలయజ్ఞంలో తెలంగాణకు అన్యాయం జరిగిందని ఆయన అభిప్రాయపడ్డారు. కాంగ్రెసు ప్రజాప్రతినిధులు, నాయకులు పార్టీ అధిష్టానం నిర్ణయానికి కట్టుబడి ఉండాలని ఆయన సూచించారు. పార్టీ అధిష్టానం నిర్ణయానికి కట్టుబడే వారే పార్టీలో ఉంటారని ఆయన అన్నారు. తెలుగుదేశం తెలంగాణ నాయకులు చంద్రబాబు నుంచి విముక్తి పొందాలని ఆయన సూచించారు.