లగడపాటి అప్పుడెందుకు చేయలేదు: విహెచ్

హైదరాబాద్: సమైక్యాంధ్ర నినాదంతో తమ పార్టీ పార్లమెంటు సభ్యుడు లగడపాటి రాజగోపాల్ తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు దీక్ష చేస్తున్న సమయంలో ఎందుకు చేయలేదని కాంగ్రెసు సీనియర్ నాయకుడు వి హనుమంతరావు ప్రశ్నించారు. కెసిఆర్ దీక్ష చేస్తున్న సమయంలో ఇప్పుడు ఆందోళన చేస్తున్న నాయకులకు సమైక్యాంధ్ర ఎందుకు గుర్తుకు రాలేదని ఆయన అడిగారు. సమైక్యాంధ్ర ఉద్యమం ఇప్పటికిప్పుడు ఎలా పుట్టుకొచ్చిందని ఆయన ప్రశ్నించారు. తెలుగుదేశం పార్టీ అధ్యక్షుడు నారా చంద్రబాబు నాయుడు వెన్నుపోటు పొడుస్తున్నారని ఆయన శనివారం మీడియా ప్రతినిధులతో అన్నారు. సమైక్యాంధ్ర ఉద్యమకారులపై ఆయన తీవ్రంగా ధ్వజమెత్తారు.

తెలంగాణపై మెజారిటీ నిర్ణయం జరగాలనేది కొత్తగా వస్తోందని ఆయన అన్నారు. ఎవరికి వారు నాయకుడు కావాలని సమైక్యాంధ్ర నినాదంతో నాయకులు పోటీ పడుతున్నారని ఆయన అన్నారు. కెసిఆర్ నిరాహార దీక్ష చేసినప్పుడు సమైక్యాంధ్రవాదులు ఉద్యమాలు చేస్తే సందేహం తలెత్తేది కాదని ఆయన అన్నారు. సమైక్యాంధ్రవాదులు విద్యార్థులను వాడుకుంటున్నారని, విద్యార్థులు వాస్తవాలు గ్రహించాలని ఆయన అన్నారు. అంతా అయిపోయాక సమైక్యాంధ్ర పేరుతో కొందరు నాయకులు ఆందోళనకు దిగుతున్నారని ఆయన అన్నారు.