మోహన్ బాబు రక్షణ కోరారు: ప్రసాదరావు

హైదరాబాద్: సినీ నటుడు మోహన్ బాబు రక్షణ కోరినట్లు హైదరాబాద్ పోలీసు కమిషనర్ ప్రసాద రావు చెప్పారు. తెలంగాణలో సినిమా షూటింగ్ లు జరపాలనుకునే వారు ముందుగానే తెలియజేస్తే తగిన భద్రత కల్పిస్తామని ఆయన చెప్పారు. సినిమా షూటింగ్ లను తెలంగాణ ఆందోళనకారులు అడ్డుకుంటున్న నేపథ్యంలో ఆయన మంగళవారం మీడియా ప్రతినిధుల సమావేశంలో ఆ విషయం చెప్పారు. ఈ నెల 31వ తేదీన నూతన సంవత్సరం వేడుకలను అడ్డుకునే వారిపై కఠిన చర్యలు తీసుకుంటామని ఆయన హెచ్చరించారు. వేడుకలను అడ్డుకునే హక్కు ఎవరికీ లేదని ఆయన చెప్పారు.

హైదరాబాదులో రేపటి నుంచి వారం రోజుల పాటు 144 సెక్షన్ అమలు చేయనున్నట్లు ఆయన తెలిపారు. ఈ నెల 30వ తేదీన జెఎసి బంద్ తలపెట్టినందున నగరంలో 112 అదనపు ప్లటూన్లను మోహరించినట్లు ఆయన తెలిపారు. జనవరి 3వ తేదీన విద్యార్థుల జెఎసి తలపెట్టిన విద్యార్థి గర్జనకు అనుమతి లేదని ఆయన స్పష్టం చేశారు. విద్యార్థులెవరూ హైదరాబాద్ రావద్దని ఆయన కోరారు.