రామోజీ ఫిల్స్ సిటీ వద్ద విద్యార్థుల ధర్నా

హైదరాబాద్: హైదరాబాద్ శివారులోని రామోజీ ఫిల్మ్ సిటీ ముందు విద్యార్థుల జెఎసి కార్యకర్తలు మంగళవారం రామోజీ ఫిల్మ్ సిటీ ముందు ధర్నా చేశారు. రామోజీ ఫిల్మ్ సిటీలో నూతన సంవత్సర వేడుకలను నిర్వహిస్తున్నందుకు నిరసన తెలుపుతూ వారు ఈ ధర్నా చేశారు. ఆందోళనకారులను పోలీసులు అదుపులోకి తీసుకున్నారు. ఈ నెల 31వ తేదీన నూతన సంవత్సర వేడుకలను తెలంగాణ ప్రజలు జరుపుకోవద్దని జెఎసి పిలుపునిచ్చింది. తెలంగాణ రాష్ట్ర ఏర్పాటు ప్రక్రియను వెంటనే ప్రారంభించాలని డిమాండ్ చేస్తూ నూతన సంవత్సర వేడుకలకు దూరంగా ఉండి సాంస్కృతిక కార్యక్రమాలు నిర్వహించుకోవాలని సూచించింది. తెలంగాణ ఉద్యోగ సంఘాల జెఎసి కూడా అదే పిలుపునిచ్చింది.

తెలంగాణ విద్యార్థులు జనవరి 3వ తేదీన తలపెట్టిన మహా గర్జనకు అనుమతి ఇవ్వాలని తెలంగాణ పార్లమెంటు సభ్యులు ముఖ్యమంత్రి కె. రోశయ్యను కోరారు. వారు ముఖ్యమంత్రితో మంగళవారం భేటీ అయ్యారు. పోలీసులు నిష్పక్షపాతంగా వ్యవహరించాలని, ఉద్యమకారులపై పెట్టిన కేసులను ఎత్తేయాలని వారు డిమాండ్ చేశారు. గుత్తా సుఖేందర్ రెడ్డి, అంజన్ కుమార్ యాదవ్ తదితరులు ముఖ్యమంత్రిని కలిసివారిలో ఉన్నారు. కాగా, డిజిపి గిరీష్ కుమార్ ముఖ్యమంత్రితో భేటీ అయ్యారు.