ఎన్టీఆర్ అదుర్స్ పై వెనక్కి తగ్గిన తెరాస

హైదరాబాద్: జూనియర్ ఎన్టీఆర్ అదుర్స్ సినిమా ప్రదర్శనను అడ్డుకోవాలనే నిర్ణయాన్ని తెలంగాణ రాష్ట్ర సమితి (తెరాస) వెనక్కి తగ్గింది. సినిమాలను అడ్డుకునే పద్ధతికి స్వస్తి చెప్పాలని రాజకీయ, ప్రజా సంఘాల జెఎసి నుంచి ఒత్తిడి పెరగడంతో తెరాస వెనక్కి తగ్గింది. తెలంగాణ కోరుకుంటున్న కొంత మంది నుంచి కూడా అదుర్స్ సినిమా ప్రదర్శనను అడ్డుకోవడంపై వ్యతిరేకత ఎదరువుతోంది. జెఎసిలో ఉన్న తెరాస మినహా మిగతా రాజకీయ పార్టీలన్నీ సినిమాలను అడ్డుకునే విధానాన్ని వ్యతిరేకిస్తున్నాయి. దీంతో తెరాస వెనక్కి తగ్గక తప్పలేదు.

కాగా, నిజామాబాద్ జిల్లా కామారెడ్డిలో గురువారంనాడు కూడా అదుర్స్ సినిమా ప్రదర్సనను అడ్డుకునే ప్రయత్నం జరిగింది. ఆందోళనకారులను పోలీసులు అరెస్టు చేశారు. తెలంగాణలోని అన్ని ప్రాంతాల్లో అదుర్స్ సినిమా ప్రదర్శిస్తున్న థియేటర్ల వద్ద భారీ బందోబస్తు ఏర్పాటు చేశారు.