లగడపాటి జగడం: శైలజ సమైక్యనాదం

విజయవాడ/హైదరాబాద్: కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ మరోసారి జగడం పెట్టారు. తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును సమైక్యవాదిగా మారుస్తాననే మాటకు కట్టుబడి ఉన్నానని లగడపాటి రాజగోపాల్ బుధవారం మీడియా ప్రతినిధులతో అన్నారు. చర్చల పేరుతో కెసిఆర్ ను ఇక్కడి దాకా తెచ్చామని ఆయన అన్నారు. అన్ని పార్టీలు కాంగ్రెసుకు విధానానికి అనుగుణంగా మారాయని ఆయన అన్నారు. దీన్ని బట్టి కాంగ్రెసు విధానం సరైందని తేలినట్లు ఆయన చెప్పారు. చర్చలకు అందరూ అంగీకరించారని, చర్చల తర్వాత ఏం జరుగుతుందనేది తనకు తెలుసునని ఆయన అన్నారు. తెలంగాణపై తాము దివంగత నేత వైయస్ రాజశేఖర రెడ్డి ప్రకటనకు కట్టుబడి ఉంటామని, తెలంగాణపై కమిటీ వేయాలనేది తమ విధానమని ఆయన చెప్పారు. అందుకు అనుగుణంగా తమ పార్టీ అధిష్టానం కదులుతోందని, తెలంగాణపై కాంగ్రెసు అధిష్టానం నిర్ణయం తీసుకుంటుందని, దానికి అందరం కట్టుబడి ఉంటామని ఆయన చెప్పారు.

రాష్టాన్ని సమైక్యంగా ఉంచాలనేదే తమ లక్ష్యమని సీమాంధ్ర జెఎసి కన్వీనర్ శైలజానాథ్ హైదరాబాదులో మీడియా ప్రతినిధులతో చెప్పారు. ఏ ఒక్కరి కోరిక మేరకో రాష్ట్ర విభజన జరగకూడదని ఆయన అన్నారు. తాను ఎవరితోనైనా చర్చించడానికి సిద్దమని, అయితే చర్చలకు పిలిచే వారు సమైక్యాంధ్రకు కట్టుబడి ఉన్నట్లు చెప్పాలని ఆయన అన్నారు. సమైక్యాంధ్ర కోసం తొలుత జిల్లా సదస్సులు నిర్వహిస్తామని, ఆ తర్వాతే హైదరాబాద్ లో సమైక్యాంధ్ర సదస్సు నిర్వహిస్తామని ఆయన చెప్పారు.