దామోదర్, జానాలకు సోనియా పిలువు

హైదరాబాద్: కాంగ్రెసు తెలంగాణ నాయకులు, శాసనసభ్యులు ఆర్ దామోదర్ రెడ్డి, కె. జానా రెడ్డిలకు ఢిల్లీ నుంచి పిలువు వచ్చింది. కాంగ్రెసు అధ్యక్షురాలు సోనియా గాంధీ నుంచి వారిద్దరికి ఆహ్వానం అందింది. దాంతో వారిద్దరు బుధవారం ఉదయం ఢిల్లీకి బయలుదేరి వెళ్లారు. తెలంగాణపై కేంద్రం ఈ నెల 28వ తేదీలోగా నిర్దిష్ట కాలపరిమితితో స్పష్టమైన ప్రకటన చేయకపోతే ప్రజాప్రతినిధులందరూ రాజీనామా చేయాలని తెలంగాణ జెఎసి నిర్ణయించిన నేపథ్యంలో వారికి ఈ పిలువు వచ్చింది. జెఎసి పెట్టిన డెడ్ లైన్ తో పార్టీ అధిష్టానంపై ఒత్తిడి పెట్టేందుకు తెలంగాణ మంత్రులు, శాసనసభ్యులు, ఎమ్మెల్సీలు మంగళవారం ఢిల్లీకి వెళ్లాల్సి ఉంది.

వారి పర్యటనకు ముందు దామోదర్ రెడ్డి, జానా రెడ్డి సోమవారం కేశవరావుతో కలిసి సోమవారం ఢిల్లీ వెళ్లారు. వారు అధిష్టానానికి చెందిన అహ్మద్ పటేల్, వీరప్ప మొయిలీలను కలిశారు. వారిద్దరితో చర్చల తర్వాత దామోదర్ రెడ్డి, జానా రెడ్డి మంగళవారం హైదరాబాద్ తిరిగి వచ్చారు. కాంగ్రెసు నాయకులు బృందాలుగా ఢిల్లీ రావద్దని కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ ఆదేశించారు. ఈ స్థితిలో కాంగ్రెసు తెలంగాణ నాయకులకు ఏం చేయాలో పాలుపోని స్థితి వచ్చింది. ఈ నేపథ్యంలో సోనియా నుంచి వారిద్దరికి పిలువు రావడం ప్రాధాన్యం సంతరించుకుంది.