బ్యాంకు మోసాల చత్వాల్ కు పద్మభూషణ్ పై దుమారం

న్యూఢిల్లీ: పద్మ అవార్డులలో వివిధ సామాజిక వర్గాలకు కోటాలు ఉన్నట్టే బ్యాంకు మోసాలకు పాల్పడిన వారికి కూడా కోటాలున్నాయా? అమెరికాకు చెందిన భారతీయ హోటల్‌ వ్యాపారి సంత్‌సింగ్‌ చత్వాల్‌ కు పద్మ భూషణ్‌ అవార్డు ప్రకటించడం వివాదాస్పదమవుతోంది. చత్వాల్‌కు అవార్డు ఎందుకు ప్రకటించారని ప్రశ్నిస్తూ ప్రతిపక్ష ఉప నేత గోపీనాథ్‌ ముండే.. ప్రధాని మన్మోహన్‌ సింగ్‌కు ఒక లేఖ రాశారు. ఆయనపై ఉన్న అవినీతి ఆరోపణలను ప్రస్తావిస్తూ..ఆయన ఆ పురస్కారానికి తగరని ఆ లేఖలో స్పష్టం చేశారు. దానిని వెనక్కు తీసుకోవాలని ముండే ప్రధానిని డిమాండ్‌ చేశారు. అయితే కాంగ్రెస్‌ మాత్రం..కర్ర విరక్కుండా పాము చావకుండా.. అన్నట్లు స్పందించింది. "అవార్డుల వ్యవహారం హోం శాఖకు సంబంధించినది." అని కాంగ్రెస్‌ అధికార ప్రతినిధి షకీల్‌ అహ్మద్‌ వ్యాఖ్యానించారు. అదే సమయంలో "ఇటువంటి అవార్డులను దేశ ప్రతిష్ఠను పెంచిన వారికి ఇవ్వాలి కానీ.. మచ్చ ఉన్న వారికి కాదు" అన్నారు.

చత్వాల్‌పై స్టేట్‌ బ్యాంక్‌ ఆఫ్‌ ఇండియాకు సంబంధించి ఇటీవలే 90 లక్షల డాలర్ల కుంభకోణంలో సీబీఐ చార్జిషీటు దాఖలు చేసింది. దానిపై ఆయన విచారణ ఎదుర్కొనడంతో పాటు..కొంత కాలం జైల్లో కూడా ఉన్నారు. అయితే చత్వాల్‌ మాత్రం తనకు ఈ పురస్కా రం ప్రకటించడం పట్ల హర్షాతిరేకాలు వ్యక్తం చేశారు. "వారం రోజుల క్రితం అమెరికా రాయబారి మీరా శంకర్‌ ద్వారా నాకు ఈ విషయం తెలిసింది. సంభ్రమాశ్చర్యాలకు గురయ్యాను. నన్ను గౌరవించినందుకు ప్రధాని మన్మోహన్‌సింగ్‌కు రుణపడి ఉంటాను" అని చత్వాల్‌ చెప్పారు. పద్మ అవార్డు ప్రకటించడంపై వివాదం గురించి ప్రస్తావించగా.. "బీజేపీ అ«భ్యంతరం గురించి నాకు తెలియదు" అన్నారు. తాను భారత్‌ను ప్రేమిస్తున్నానని, 30 ఏళ్లుగా దేశానికి సేవ చేస్తున్నానని చెప్పారు.