శుభవార్తతో తిరిగి వస్తాం: దామోదర్ రెడ్డి

హైదరాబాద్: తాము ఢిల్లీ నుంచి శుభవార్తతో తిరిగి వస్తామని కాంగ్రెసు సీనియర్ శాసనసభ్యుడు, మాజీ మంత్రి ఆర్ దామోదర్ రెడ్డి ఆశాభావం వ్యక్తం చేశారు. పార్టీ అధ్యక్షురాలు సోనియా గాంధీ ఆహ్వానంతో తన సహచరుడు కె. జానా రెడ్డితో కలిసి ఢిల్లీకి బయలుదేరే ముందు ఆయన బుధవారం ఉదయం మీడియా ప్రతినిధులతో మాట్లాడారు. తెలంగాణ రాజకీయ జెఎసి డెడ్ లైన్ కు, తమ ఢిల్లీ పర్యటనకు సంబంధం లేదని ఆయన అన్నారు. తెలంగాణకు అనుకూలంగా కేంద్రం నుంచి నిర్ణయం వస్తుందనే నమ్మకం తమకు ఉందని ఆయన చెప్పారు.

తెలంగాణలో జరుగుతున్న విద్యార్థుల ఆత్మహత్యల గురించి సోనియాకు వివరిస్తామని ఆయన చెప్పారు. తెలంగాణలో తాజా పరిణామాలను కూడా తాము వివరిస్తామని ఆయన చెప్పారు. తెలంగాణ రాష్ట్ర ఏర్పాటు ప్రక్రియను కేంద్ర ప్రభుత్వం వేగవంతం చేయడానికి తగిన విధంగానే తాము వ్యవహరిస్తున్నట్లు ఆయన తెలిపారు. పొగ మంచు వల్ల ఇద్దరు కాంగ్రెసు నాయకులు ఢిల్లీ పర్యటనలో కాస్తా ఆలస్యం జరిగింది. వారు బుధవారం మధ్యాహ్నం సోనియాను కలిసే అవకాశం ఉంది.