రైతులను వెంటనే ఆదుకోండి: సిఎం

హైదరాబాద్: అకాల వర్షాల వల్ల నష్టపోయిన రైతులను వెంటనే ఆదుకోవాలని ముఖ్యమంత్రి కె. రోశయ్య జిల్లా కలెక్టర్లను ఆదేశించారు. బుధవారం అకాల వర్షం వల్ల రైతులు తమ పంటలను కోల్పోయారు. ఏడుగురు మరణించారు. ఈ స్థితిలో ఢిల్లీ నుంచి తిరిగి వచ్చిన ముఖ్యమంత్రి గురువారం ఉదయమే ప్రకాశం, కడప, చిత్తూరు, కర్నూలు జిల్లాల కలెక్టర్లతో వీడియో కాన్ఫరెన్స్ నిర్వహించారు. అకాల వర్షాలకు నష్టపోయిన రైతుల గురించి ఆయన అడిగి తెలుసుకున్నారు.

అకాల వర్షాల వల్ల నష్టపోయిన రైతుల పరిస్థితిపై ముఖ్యమంత్రి ప్రభుత్వ ప్రధాన కార్యదర్శితో సమీక్ష నిర్వహించారు. నష్టపోయిన రైతులను అన్ని విధాలా ఆదుకోవాలని ఆయన ఆదేశించారు. బుధవారం పలు చోట్ల వడగళ్ల వాన కురిసింది. మామిడి, అరటి తోటలు దెబ్బ తిన్నాయి.