మాజీ ఆర్మీ ఉద్యోగి కొండల్ రెడ్డి అరెస్టు?

వరంగల్: ఆర్మీలో ఉద్యోగాలు ఇప్పిస్తానని మోసం చేసిన మాజీ సైనికోద్యోగి కొండల్‌రెడ్డిని హన్మకొండ పోలీసులు సోమవారం అదుపులోకి తీసుకున్నట్లు తెలి సింది. కడప జిల్లాకు చెందిన కొండల్‌రెడ్డి గతంలో ఆర్మీలో పనిచేసి పదవీ విరమణ పొందాడు. ప్రస్తుతం హైదరాబాద్‌లో ఓ కన్సల్టెన్సీ నిర్వహిస్తున్నట్లు తెలిసింది. నిరుద్యోగ యువకులకు కన్సల్టెన్సీ ద్వారా ఉద్యోగాలిప్పిస్తానని వారి వద్ద డబ్బులు వసూలు చేశాడని సమాచారం.

శ్రీకాకుళం జిల్లాకు చెందిన కొందరు యువకులకు వరంగల్‌లో జరుగుతున్న ఆర్మీ రిక్రూట్‌మెంట్‌లో ఉద్యోగాలిప్పిస్తానని చెప్పి ఒక్కొక్కరి వద్ద రూ.2లక్షల చొప్పున వసూలు చేసి, మరో మాజీ ఆర్మీ ఉద్యోగి యశ్‌పాల్‌సింగ్‌కు ఆ యువకులను అప్పగించినట్లు తెలిసింది. రంగారెడ్డి జిల్లాలో బోగస్‌ నివాస ధ్రువపత్రాలు ఇప్పించినట్లు సమాచారం.

పోలీసులపై దాడి జరిగిన అనంతరం కొండల్‌ రెడ్డి, యశ్‌పాల్‌సింగ్‌ పరారయ్యారు. కొండల్‌రెడ్డి టైలర్‌స్ట్రీట్‌లో ఓ లాడ్జ్‌లో ఉన్నాడని సమాచారం అందింది. దీంతో హన్మకొండ సీఐ శోభన్‌ కుమార్‌ ఆధ్వర్యంలో లాడ్జ్‌పై దాడిచేసి కొండల్‌రెడ్డిని అదుపులోకి తీసుకున్నారు. అతడి వద్ద నుంచి ఆర్మీ రిక్రూట్‌మెంట్‌ ఉద్యోగాల కోసం తయారు చేయించిన బోగస్‌ సర్టిఫికెట్లు స్వాధీనం చేసుకున్నట్లు సమాచారం.