కెసిఆర్ పై ఇసికి లగడపాటి ఫిర్యాదు

న్యూఢిల్లీ: తెలంగాణ ఇవ్వకపోతే అంతర్యుద్ధం తప్పదని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు చేసిన వ్యాఖ్యపై కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ ఎన్నికల కమిషనర్ నవీన్ చావ్లాకు ఫిర్యాదు చేశారు. ఈ మేరకు ఆయన గురువారం నవీన్ చావ్లాతో సమావేశమై కెసిఆర్ వ్యాఖ్యలపై, తెరాస తీరుపై వివరించినట్లు సమాచారం. తెరాస గుర్తింపును రద్దు చేయాలని ఆయన చావ్లాను కోరారు. అదే విధంగా ఎన్నికల్లో పోటీకి కెసిఆర్ ను అనర్హుడిగా ప్రకటించాలని ఆయన విజ్ఞప్తి చేశారు.

దేశ సమైక్యతకు, సౌభ్రాతృత్వానికి భంగం వాటిల్లేలా కెసిఆర్ ప్రకటనలు చేస్తున్నారని ఆయన ఆరోపించారు. కెసిఆర్ ప్రజలను రెచ్చగొట్టే విధంగా మాట్లాడుతుండడం వల్ల శాంతికి భంగం వాటిల్లే ప్రమాదం ఉందని ఆయన అన్నారు. లగడపాటి రాజగోపాల్ వెంట మరో కాంగ్రెసు పార్లమెంటు సభ్యుడు సబ్బం హరి కూడా ఉన్నారు. కెసిఆర్ పై ఇదివరకు ఒకసారి లగడపాటి ఎన్నికల కమిషన్ కు ఫిర్యాదు చేశారు. తెరాసను ఉగ్రవాద సంస్థగా అభివర్ణించారు.