కాంగ్రెసులో చేరనున్న ఖుష్బూ

చెన్నై: పెళ్లికి ముందు సెక్స్‌ వ్యాఖ్యలపై దాఖలైన కేసుల నుంచి బయటపడిన నటి ఖుష్బూ త్వరలో కాంగ్రెసు లో చేరనున్నట్లు తెలుస్తోంది. తనపై కేసులు పెట్టిన వారిని రాజకీయంగా దెబ్బ కొట్టడానికే ఆమె ఈ నిర్ణయం తీసుకున్నట్లు చెబుతున్నారు. ఆమె కొన్నాళ్లక్రితం అన్నాడీఎంకే అధినేత్రి జయలలితకు చాలా సన్నిహితంగా కనిపించారు. అప్పుడు ఆ పార్టీలో చేరుతారేమోననే వార్తలు కూడా వెలువడ్డాయి. కానీ ఆ తర్వాత ఖుష్బూ ఎక్కడా రాజకీయ ప్రస్తావన తీసుకురాలేదు.

ఇప్పుడు ఖుష్బూ కాంగ్రెసులో చేరాలనే నిర్ణయానికి వచ్చారనే వార్త తమిళనాడులో ప్రచారం జరుగుతోంది. ప్రస్తుతం లండన్‌ లో ఉన్న ఖుష్బూను ఓ తమిళపత్రిక ఫోనులో రాజకీయ అరంగేట్రం గురించి ప్రస్తావించింది. తాను కాంగ్రెసు అభిమానిని అని, అందులో అవకాశం వస్తే ఎట్టి పరిస్థితుల్లోనూ వదులుకోనని చెప్పారు. కాంగ్రెసు నేత మిమ్మల్ని పార్టీలో చేరాలని ఆహ్వానిస్తే అనే ప్రశ్నకు, ఇప్పుడే సమాధానం చెప్పలేనన్నారు. ఖుష్బూ కాంగ్రెసులోకి వస్తానంటే ఆహ్వానిస్తామని తమిళనాడు కాంగ్రెసు కమిటీ అధ్యక్షుడు తంగబాలు చెప్పారు.