రోశయ్యతో నన్నపనేని రాజకుమారి భేటీ

హైదరాబాద్: ముఖ్యమంత్రి కె. రోశయ్యతో తెలుగుదేశం నాయకురాలు నన్నపనేని రాజకుమారి శుక్రవారం భేటీ అయ్యారు. ఈ భేటీపై రాజకీయంగా చర్చ జరుగుతోంది. కాంగ్రెసు పార్టీలో చేరడానికే ఆమె ముఖ్యమంత్రిని కలిశారనే ప్రచారం జరుగుతోంది. తాను తెలుగుదేశం పార్టీలోనే ఉంటానని ఆమె ఇటీవల చెప్పినప్పటికీ కాంగ్రెసులో చేరడానికే నిర్ణయించుకున్నట్లు చెబుతున్నారు. తెలుగుదేశం పార్టీ వ్యవహారాల పట్ల ఆమె అసంతృప్తిగా ఉన్న మాట మాత్రం వాస్తవం.

తాను నియోజకవర్గం అభివృద్ధి నిధుల కోసం, నియోజకవర్గం సమస్యలపై మాట్లాడడానికి మాత్రమే ముఖ్యమంత్రిని కలిశానని ఆమె మీడియా ప్రతినిధులతో చెప్పారు. ముఖ్యమంత్రిని కలిస్తే తప్పా అని ఆమె మీడియా ప్రతినిధులను అడిగారు. మీడియా అనవసరమైన రాద్ధాంతం చేస్తోందని ఆమె ఆడిపోసుకున్నారు. తనపై రాద్ధాంతం ఎందుకు చేస్తున్నారని ఆమె మండిపడ్డారు. మీడియా కావాలనే తన విషయంలో వివాదం సృష్టిస్తోందని ఆమె అన్నారు.