విద్యాహక్కును అమలు చేయండి: రోశయ్య

హైదరాబాద్: విద్యా హక్కు చట్టాన్ని సమగ్రంగా అమలు చేయాలని ముఖ్యమంత్రి కె. రోశయ్య అధికారులను ఆదేశించారు. విద్యాశాఖపై ఆయన శుక్రవారం సమీక్ష నిర్వహించారు. విద్యాసంస్థలు తిరిగి ప్రారంభమయ్యే నాటికి అన్ని పాఠశాలల్లోనూ పాఠ్య పుస్తకాలు అందుబాటులో ఉండేలా చర్యలు తీసుకోవాలని సూచించారు. మధ్యాహ్న భోజన పథకం చెల్లింపుల్లో జాప్యం లేకుండా చర్యలు తీసుకోవాలని కూడా ఆయన అధికారులను ఆదేశించారు.

ఇప్పటికే 75 శాతం పాఠ్యపుస్తకాలు పాఠశాలలకు చేరాయని సమీక్షానంతరం విద్యాశాఖ మంత్రి మాణిక్యవర ప్రసాద్ మీడియా ప్రతినిధులతో చెప్పారు. మరో పది రోజుల్లో మిగతా 25 శాతం పాఠ్యపుస్తకాలు కూడా పాఠశాలలకు చేరుతాయని ఆయన చెప్పారు. జూనియర్ కళాశాలల్లో మౌలిక సదుపాయాల కల్పనకు ప్రతిపాదనలు పంపాలని ముఖ్యమంత్రి ఆదేశించినట్లు ఆయన తెలిపారు. డిఎస్సీ - 2008 నియామకాలపై వచ్చే నెల 7వ తేదీలోగా తుది నిర్ణయం తీసుకుంటామని ఆయన చెప్పారు.