మృతుల్లో ఎక్కువ మంది మలయాళీలు

మంగుళూరు: మంగుళూరు విమానప్రమాద దుర్ఘటనలో మృతిచెందిన 159 మందిలో అధికశాతం మంది కేరళకు చెందినవారని ఎయిర్‌ ఇండియా డైరక్టర్‌ అనూప్‌ శ్రీవాస్తవ తెలిపారు. మృతుల్లో 19మంది పిల్లలుకాగా నలుగురు శిశువులు ఉన్నారని ఆయన తెలిపారు. సహాయక బృందాలను ముంబయినుంచి మంగుళూరుకు ప్రత్యేక విమానంలో పంపామన్నారు. ప్రమాదానికి కారణాలపై దర్యాప్తు చేస్తున్నారని ముందే దానిపై వ్యాఖ్యానించటం సరికాదని ఆయన మీడియా ప్రతినిధులతో అన్నారు.

మంగుళూరులో ప్రమాదానికి గురైన ఎయిరిండియా విమానంలో 173 మంది ప్రయాణీకులు ఉండగా 9మంది వరకు ప్రాణాలతో బయటపడినట్లు తెలుస్తోంది. ఘటనాస్థలంలో యుద్ధ ప్రాతిపదికన సహాయక చర్యలు చేపట్టిన భద్రతా సిబ్బంది ముందు మంటలను అదుపుచేశారు. ఆ తర్వాత 90 మృతదేహాలను బయటకు తీశారు.

మంగుళూరులో జరిగిన విమానప్రమాదంలో మృతి చెందినవారి కుటుంబాలకు ఎక్స్‌గ్రేషియాను ప్రభుత్వం ప్రకటించింది. మృతి చెందిన ఒక్కొక్కరి కుటుంబానికి రెండు లక్షల రూపాయలు, క్షతగాత్రులకు 50 వేల రూపాయల ఎక్స్‌గ్రేషియానుఅందజేస్తామని ప్రధాని మన్మోహన్‌సింగ్‌ ప్రకటించారు.