సీమాంధ్ర నేతల కట్టడికి సిఎంతో డిఎస్ మంతనాలు

హైదరాబాద్: తెలంగాణలో జరిగే ఉప ఎన్నికల విషయంలో పార్టీకి సంబధించిన సీమాంధ్ర నేతల కట్టడికి ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ నడుం బిగించినట్లు తెలుస్తోంది. ఇందులో భాగంగానే ఆయన బుధవారం ముఖ్యమంత్రి కె. రోశయ్యను కలిసినట్లు చెబుతున్నారు. ఎన్నికల్లో తెలంగాణ నివాదంతో ప్రచారం కూడదని అనంతపురం పార్లమెంటు సభ్యుడు అనంత వెంకటరామి రెడ్డి చేసిన ప్రకటనతో వివాదం ప్రారంభమైంది. దీంతో సీమాంధ్ర నేతలు తెలంగాణలో జరిగే ఉప ఎన్నికల్లో జోక్యం చేసుకోవడం గానీ వివాదాలకు తావిచ్చే ప్రకటనలు చేయడం గానీ కూడదని డిఎస్ అన్నట్లు తెలుస్తోంది. తాను తెలంగాణకు చెందినవాడినైందున తాను మాట్లాడితే సరిగా స్వీకరించే అవకాశం లేదని ఆయన భావించి రోశయ్యతో సీమాంధ్ర నేతలకు సూచనలు చేయించేందుకు పూనుకున్నట్లు చెబుతున్నారు. ఈ విషయంపైనే రోశయ్యతో డిఎస్ ప్రధానంగా చర్చించినట్లు సమాచారం.

ఉప ఎన్నికలకు అభ్యర్థుల ఎంపికపై, తాజా రాజకీయ పరిణామాలపై, తమ పార్టీ పార్లమెంటు సభ్యుడు వైయస్ జగన్ ఓదార్పు యాత్రపై ఇరువురి మధ్య చర్చలు జరిగినట్లు భావిస్తున్నారు. కాగా, విద్యార్థుల ఫీజుల చెల్లింపు అంశంపై కూడా వారు చర్చించారు. ఎన్ని ఇబ్బందులొచ్చినా ఫీజుల చెల్లింపులకు ఆటంకం రానివ్వొద్దని సీఎంకు డీఎస్‌ విజ్ఞప్తి చేశారు. పరిస్థితులను బట్టి విడతలవారీగా చెల్లింపులన్నీ పూర్తిచేస్తామని డీఎస్‌కు రోశయ్య హామీ ఇచ్చినట్లు సమాచారం. జూలై 8న వైఎస్‌ జయంతి కార్యక్రమంపై కూడా చర్చించినట్లు తెలిసింది.